老占的博客: 比妳有背景、比妳靚、還要比妳努力(三)

老占的博客: 比妳有背景、比妳靚、還要比妳努力(三):



'via Blog this'



「父母都希望小孩有一個Certain Future（確定的未來），但現在最需要的人格特質是，要有冒險精神，因為世界改變太快。」



上禮拜帶細仔返樂器班有感，嗰班細路至少小一，最大小三，老師問問題，家長喺後面搶答！！！



咪玩啦，個老師想自己付出少少收獲大大先叫你班家長入去旁聽啫。學音樂為乜？你只係想要張 cert 的話唔關我事，但你咁教仔的話個仔一世都係裙腳仔。但裙腳仔總有一日想脫離你嘅魔掌，可惜到時先發現自己原來想行自己嘅路都咁困難。



先苦後甜總比先甜後苦好，放手吧！細路首先要學識照顧自己，佢先識為自己打算，佢開竅的話必定比你哋為佢打算更優勝！

人在中環: 囝囝的未來

仔: 其實爸爸都係一樣，爸爸從來都只係希望你地可以快快樂樂，健健康康咁生活。當然你地將來有所成就，爸爸一定會替你地高興，但係做人最緊要係有誠信，搵唔到錢唔緊要，但係絕唔可以自私自利，做啲損人利己的事情。再者一定要潔身自愛，千祈唔好誤入歧途。你地可以做到咁樣，我真係已經足夠。做人做事，基本功先係最重要。

星期一, 四月 11, 2011

人在中環: 囝囝的未來

對於囝囝將來讀邊間學校，我諗我算係朋友間「相對」冇咁緊張既一個。

我之所以講係「相對」冇咁緊張，一來我個仔仲細，問題未殺到埋身。二來我其實又唔算完全唔緊張。至少相比BB未出世之前，我對呢方面既態度係有些少改變。

話自己相對冇咁緊張，主要係因為我冇好似我一d朋友咁，咁desperate希望囝囝囡囡入到果十隻手指數得晒既傳統名校。心裡面既諗法，都係「咁好彩入到就當中獎，入唔到又唔覺得有乜唔妥」咁啦。我份人好懶，要我好似我有d朋友咁，為左想個仔入到心儀既名校，做無數咁多準備工夫，我寧願唔入算數。或者係偏見都唔定，我總覺得入名校最大既好處，並唔係佢能教到你個仔變得特別叻，而係日後囝囝大個之後既social network。有朋友話，囝囝入到名校既話，自信心會大一d。講真，見人見至啦我覺得。響名校裡面包尾，所建立既自信心我估應該強唔過響間冇咁有名既學校裡面考第一掛。個仔入左名校，自信心會大d果個，可能只係個家長。

我心裡面冇一個心儀名校list，不過我卻有一個「唔想個仔入」既學校名單響心裡面。其實呢個「唔想佢入」既名單，even響BB未出世之前我一直都有。冇，我覺得我唔需要個仔特別叻，但同時我亦怕個仔會去到一d唔好既學校，交到壞朋友又或者沾染到一d壞習慣。都係果句，可能只係偏見，但我對於朋輩對一個小朋友既影響，我卻深信不疑。以前唔緊張，係因為我覺得，要避開呢d「唔想個仔入」既學校，唔係好難，冇道理好似我果班好肉緊既朋友們咁瘋狂。後來老婆大肚，開始慢慢study多左有關香港學制同埋社會現實既時候，先開始意會到，完來我一直以為自己所謂「要求唔高」既目標，都唔係咁輕鬆就可以做得到。effort，原來多多少少還是要付出一點點。

得承認既係，當身邊一大班朋友，都努力為自己仔女既升學努力張羅既時候，自己仲係一碌木咁企響度懶懶閒，多少覺得自己唔係好妥。老土地講，我對囝囝其實冇乜期望，只希望佢能健健康康快快樂樂咁做人。不過快樂，有時還是需要一點事業同成就配合。今日如果我冇出過力去為佢既升學張羅，令佢入唔到好既學校，他日佢長大成人，事業上遇到種種不如意不公平既時候，佢會唔會返轉頭怨我呢個老豆，當年冇好好努力咁幫佢？

懶爹哋

大B不經不覺已經20個月大,細仔眨吓眼都2個月大lu. 近來一直都好想努力寫返啲嘢,但係一直都冇實行度,唉,我就係咁,希望可以改,唔好再咁懶.

睇完李師奶個Blog,真係自愧不如.喺裡面睇到一句“其實媽媽不捨得妳的感覺絕不會比妳少呢”,睇完之後好有感覺,使我不期然的起心肝再次寫低少少嘢.

做左爸爸都20個月有多,好多嘢都一直在變.例如入息時間唔同左,同身邊家人朋友的關係又變左,怎至乎工作上都唔同左,總之一直在變,都冇話適唔適應,煮到埋黎想唔變都唔得. 好在,一切轉變都係好多過壞,唯獨是屬於自己的時間變得越來越少.

每次失落,只要諗起大B你可愛的笑容,想像一吓佢喺面前叫聲爸爸,真係會成個人醒哂.阿仔,你是爸爸的全部,我愛你!

相對細B,爸爸對你的付出實在真係太少,爸爸放在哥哥的時間真的比較多,某程度上都可以話有啲偏心,但係認真諗一諗,其實你哋係爸爸心中都佔相同份量,2個都一樣咁重要,一個都不能少.

Last but not least, 老婆你真係好偉大!

仔仔今日一歲喇!!!

諗番起由自己親手剪斷條臍帶開始,話咁快就一年.諗番起呢段時間裡面,雖然冇左好多私人時間,但係都總算係開心多左.每晚放工返到屋企,就陪佢玩到瞓覺為止,雖然每日都可能只係得個零鐘頭時間真正相處,但係佢都好鐘意捉住我哋玩玩抱抱.屋企多左個B,真係熱鬧好多

從一開始,只係瞓飽就食食飽就瞓,到而家通屋爬冇時停.睇住佢一日一日長大,每個階段都好似眨眼就過左.而家做左爸爸先至清楚,身體健康真係最重要.好彩阿仔到而家都未病過,但係每次打完針或者有少少唔妥都真係會好擔心.

家庭生活理應係最重要一個聯繫,但係真係唔明白好多人都唔重視.有時真係激氣

BB就黎要出世喇

差啲唔記得左為了BB的來臨而開始寫呢個blog.唔經唔覺,BB已經37週喇,隨時都會出世,所以近幾個禮拜都為左BB週圍Shopping,不過好似仲係差啲咁.唔緊要啦,爸爸媽媽愛心搭夠.

呢個第時一定係百厭BB,佢最高記錄喺媽媽肚裡面半個鐘裡面郁左18下,利害程度係我隔住層肚皮都望得到.

宜家開始真係越來越忙,嫲嫲今個禮拜要番黎lu,好多人都好錫你架,BB你要加油,爸爸媽媽永遠都咁愛你

BB喺媽咪個肚裡面4個月lu.

尋日聽到人講,醫院產前講座會喺2月再次接受報名. 終於有幾會可以俾我有機會親眼望住BB出黎呢個世界. 當然,除此之外,可以俾我喺產房照顧老婆都係最大原因,好驚佢推左入去自己一個會慌失失,有唔妥都唔識出聲.

老婆有左之後,先知道原來有好多檢查要做. 繼上次臨到mun先搵到地方照OSCAR,又要搵地方做結構性超聲波. 點知原來係自己慒炳,政府醫院已經安排左,係自己冇睇清楚,攪到自己嚇左自己一輪.

今個禮拜又發左次怪夢,不過好攪笑.夢見BB出左世,竟然唔記得左買奶樽,結果就揹著BB周圍搵,點知又斷哂貨. 可能係BB見個呢排懶散左,所以就提醒我要快啲準備好佢啲用品.

講起用品,又係一個煩惱. 果日打開本雜誌睇,發現原來BB用的必須品有好多,買完番黎都唔知放邊. 阿媽番黎,又要諗定地方俾佢瞓,唔知點算好.

老婆呢幾日話feel到BB胎動喇,感覺一定好特別啫.